ఎల్బీ స్టేడియం, న్యూస్‌లైన్: రాష్ట్ర స్పోర్ట్స్ అథారిటీ(శాప్)లో 31 మంది ఉద్యోగులకు, కోచ్‌లకు పదోన్నతి లభించింది.దాదాపు 18 ఏళ్ల తర్వాత కోచ్‌లు పదోన్నతి పొందడం గమనార్హం. గత నెల 18న శాప్ డిపార్ట్‌మెంట్ ప్రమోషన్ కమిటీ(డీపీసీ) సమావేశంలో అర్హత కలిగిన ఉద్యోగులకు, కోచ్‌లకు ప్రమోషన్ ఇవ్వాలని ప్రభుత్వానికి సిఫారసు చేశారు. అయితే ఉప ఎన్నికల కోడ్ కారణం గా ఉత్తర్వుల అమలులో జాప్యం జరిగింది. 

ఎన్నికలు ముగియడంతో సంబంధిత ఉద్యోగులకు, కోచ్‌లకు ప్రమోషన్ కల్పిస్తూ శాప్ మేనేజింగ్ డెరైక్టర్ టి.ఆర్.కె.రావు తాజాగా శనివారం ఉత్తర్వులు జారీ చేశారు. హకీంపేట్‌లోని రాష్ట్ర స్పోర్ట్స్ స్కూల్‌లో ప్రత్యేక అధికారిగా పని చేస్తున్న గ్రేడ్-1 కబడ్డీ కోచ్ డాక్టర్ కె.నర్సయ్యను కీలకమైన శాప్ టెక్నికల్ అసిస్టెంట్ డెరైక్టర్‌గా నియమించారు. మినిస్టర్ స్టాఫ్ ఉద్యోగుల్లో జూనియర్ అసిస్టెంట్లను 14 మంది సీనియర్ అసిస్టెంట్లుగా, నలుగురు సీనియర్ అసిస్టెంట్లను సూపరింటెండెంట్లుగా, గ్రేడ్-3 కోచ్‌ల్లో ఏడుగురికి గ్రేడ్-2 కోచ్‌లుగా, గ్రేడ్-2 కోచ్‌ల్లో ఐదుగురికి గ్రేడ్-1 కోచ్‌లుగా పదోన్నతి లభించింది. 

బెంగళూరు: భారత టెన్నిస్ సమాఖ్య నూతన అధ్యక్షుడిగా అనిల్ ఖన్నా నియమితులయ్యారు. ఖన్నా ప్రస్తుతం ప్రధాన కార్యదర్శిగా కొనసాగుతున్నారు. శనివారం జరిగిన వార్షిక సాధారణ సమావేశంలో ఏకగ్రీవంగా కొత్త ఆఫీస్ బేరర్ల ఎంపిక జరిగింది. గత 12 ఏళ్లుగా ఈ పదవిలో ఉన్న యశ్వంత్ సిన్హా స్థానంలో ఖన్నా బాధ్యతలు చేపట్టనున్నారు. ఇక ప్రధాన కార్యదర్శిగా భరత్ ఓజా, సంయుక్త కార్యదర్శిగా సీఎస్ సుందర్ రాజు, కోశాధికారిగా రక్తిమ్ సిఖియా ఎంపికయ్యారు.

 జకార్తా: భారత బ్యాడ్మింటన్ స్టార్ సైనా నెహ్వాల్‌ ఇండోనేసియా ఓపెన్ సూపర్ సిరీస్ ప్రీమియర్ టోర్నమెంట్‌లో విజేతగా నిలిచింది. మహిళల సింగిల్స్ టైటిల్ ను ఆమె సొంతం చేసుకుంది. ఆదివారం జరిగిన తుది పోరులో ప్రపంచ మూడో ర్యాంకర్ జురుయ్ లీ (చైనా)ను 13-21, 22-20, 21-19 తేడాతో ఓడించింది. హోరాహోరీగా జరిగిన ఫైనల్లో మొదటి సెట్ గెల్చుకున్న సైనా రెండో సెట్ లో వెనుకబడింది. అయితే నిర్ణయాత్మక మూడో సెట్ లో పుంజుకుని ప్రత్యర్థిని మట్టి కరిపించి విజేతగా అవతరించింది. 

ఈ హైదరాబాదీ షట్లర్ 2009, 2010లోనూ ఇండోనేసియా ఓపెన్ చాంపియన్ గా నిలిచింది. ఈ ఏడాది స్విట్జర్లాండ్, థాయిలాండ్, ఇండోనేసియా టైటిల్స్ గెల్చుకోవడం ద్వారా సైనా నెహ్వాల్ సత్తా చాటింది.

దుబాయ్: అంతర్జాతీయ క్రికెట్‌లో వంద సెంచరీలు పూర్తి చేసుకున్న భారత స్టార్ క్రికెటర్ సచిన్ టెండూల్కర్‌కు ‘విజ్డెన్ ఇండియా అవుట్‌స్టాండింగ్ అచీవ్‌మెంట్’ అవార్డు దక్కింది. ఫిడెలిస్ వరల్డ్ నిర్వహించిన ఒక కార్యక్రమంలో సచిన్ ఈ పురస్కారం స్వీకరించాడు. పుస్తకంలోని ఖాళీ పేజీలపై ఒక క్రికెట్ బంతిని ఉంచినట్లుగా తయారు చేసిన ప్రత్యేక క్రిస్టల్ ట్రోఫీని ఈ సందర్భంగా మాస్టర్‌కు అందజేశారు. ఈ ట్రోఫీకి ఒక వైపు టెస్టుల్లో సచిన్ చేసిన 51 సెంచరీలు, మరో వైపు 49 వన్డే సెంచరీల జాబితాను ముద్రించారు. ఈ సందర్భంగా మాట్లాడుతూ సచిన్, చెన్నై (2008)లో ఇంగ్లండ్‌పై చేసిన సెంచరీనే తన అత్యుత్తమమని పేర్కొన్నాడు. 

పారిస్: రఫెల్ నాదల్ ఫ్రెంచ్ ఓపెన్ విజేతగా నిలిచాడు. జోకోవిచ్‑పై 6-4,6-3,2-6,7-5 తేడాతో నాదల్ విజయం సాధించాడు. నాదల్ ఏడవ సారి ఈ టైటిల్‑ని గెలుచుకున్నాడు. ప్రైజ్ మనీగా నాదల్‑కు 8 కోట్ల 67 లక్షల రూపాయలు లభిస్తాయి. అతనికి ఇది 11వ గ్రాండ్‑స్లామ్ టైటిల్. ఏడు ఫ్రెంచ్ ఓపెన్, రెండు వింబుల్డన్, ఒక ఆస్ట్రేలియా, ఒక యుఎస్ టైటిల్స్‑ని నాదల్ గెలుచుకున్నాడు.

FOX SPORTS NEWS

బ్యాంకాక్: భారత బ్యాడ్మింటన్ స్టార్ ప్లేయర్ సైనా నెహ్వాల్ ఖాతాలో మరో టైటిల్‌ చేరింది. టాప్‌ సీడ్‌ సైనా నెహ్వాల్‌ థాయ్‌ ఓపెన్‌ గెలుచుకుంది. బ్యాంకాక్‌లో ఆదివారం హోరాహోరీగా సాగిన ఫైనల్లో రెండో సీడ్‌ రచనోక్ ఇంతనోన్‑పై 19-21, 21-15, 21-10 స్కోర్‌తో సైనా గెలుపొందింది.